السيسي لقوات التدخل السريع: «بصوا حواليكم كويس.. وبفضل الله منصورين» (فيديو)

قال الرئيس عبدالفتاح السيسي إنه لديه يقين من الله بأنه سينصر مصر، لافتًا إلى أن البلاد في «صراع مع الوقت والزمن، موضحًا: «بفضل الله إحنا منصورين».

وأوضح السيسي، في كلمته أثناء تفقد قوات التدخل السريع المحمولة جواً ذات التشكيل الخاص، الخميس: «كان لازم أجي النهاردة عشان أطمئن عليكم وأسعد كمان باللي أنا شفته النهاردة».

وأضاف: «عايز أقول للقوات اللي موجودة قدامي أنتم بالذات لازم شعاركم يبقى مختلف، شعار قوة التدخل السريع مختلف، ونستمد من الشعار أسلوبنا يعني أدائنا يعني كفائتنا، وبقول له كن قويا كن قادرا كن كفئًا كن مستعدًا».

ومضى قائلًا: «ليه محتاجين ده؟ طيب القوات المسلحة لازم تكون شغالة في الصفات دي، ده صحيح، لكن قوة التدخل السريع أكثر جاهزية وأكثر استعدادًا لأن رد الفعل لقوة التدخل السريع يمكن مش بالأيام ولا الساعات يمكن أقل من الساعات».

وشدد بقوله: «إحنا موجودين عشان نحمي بلدنا وحدودنا، ولو الأمر تتطلب حاجة تانية نبقى قادرين وجاهزين وبقول لينا كلنا لازم قوات التدخل السريع في أعلى الجاهزية وأعلى مستوى من الكفاءة القتالية، وأنا عارف إن أنتم بتبذلوا جهد كبير دلوقتي بالذات في كل حتة بس القوات المسلحة لازم تكون دايما في طليعة أجهزة الدولة ومؤسسسات الدولة في كل شئ عشان إحنا محتاجين الجهد ده، ومحتاجين الأداء ده وكمان معاه الإخلاص، وكمان معاه الأمانة وكمان معاه الشرف».

وتابع: «دي صفات موجودة جوانا كلنا كمصريين، لكن كمان لازم تبقى موجودة بشكل مبالغ فيه في الجيش اللي بيحمي مصر والناس اللي مستعدة تضحي بنفسها عشان خاطر بلدها مصر».

وأضاف: «أنا بشكركم وبوصيكم شوفوا وبصوا حواليكم كويس، الكلمة دي بقولها لنفسي وللقوات المسلحة والشرطة ولكل المصريين من فضلبكم عايزين ننتبه لبلدنا ونحافظ عليها، مش عشانا إحنا بس، عشان إحنا وخاطر أبنائنا والأجيال القادمة».

وقال: «مستعجلين شوية أيوة صحيح عشان إحنا في صراع مع الوقت والزمن، ولازم نكون متأكدين إننا بفضل الله إحنا منصورين، ليه متأكدين وعندنا يقين إن ربنا سبحانه وتعالى هيساعدنا».

وأضاف: «ببساطة خالص إحنا بنتكلم على بناء وعلى تعمير وبنتكلم على إصلاح يعني لا نبغي الفساد والآية بتقول إن الله لا يحب المفسدين يبقى عسكها إن ربنا يحب المصلحين وإحنا شاء الله بنصلح، واطمنت وكنت مطمن واطمنت أكتر».

واختتم: «ربنا يحفظكم ويحفظ جيش مصر وشرطة مصر ويحفظ مصر كلها، اللهم أمين، متشكرين».

المصدر : msn اخبار مصر